М. УБАЙДУЛЛОЕВ БО МАРДУМ БА ҲАШАРИ УМУМИШАҲРӢ БАРОМАД

              Душанбе, 15 ноябр. (АМИТ «Ховар», Марзия Саидова).-Субҳи 15-уми ноябр якҷоя бо Раиси шаҳри Душанбе Маҳмадсаид Убайдуллоев беш аз 5 ҳазор шаҳрвандони Душанбе ва кормандони идораю муассисаҳои дар қаламрави пойтахт буда, ба ҳашари умумишаҳрӣ баромада, дар тоза намудани канали дереватсионӣ ва ҳавзи танзими шабонарӯзии муассисаи хизматрасонии пойтахт саҳм гузошта истодаанд.              Тавре котиби матбуоти раиси шаҳри Душанбе Шавкат Саидов аз маҳали баргузории ҳашари умумишаҳрӣ ба хабарнигори АМИТ «Ховар иттилоъ дод, — ин иқдом аз ҷониби шаҳрдорӣ бо мақсади ҳарчи бештар дастрас гардидани оби тозаи ошомиданӣ ба шаҳрвандон андешида шудааст.               Ҳашар аз ҷониби сокинон ва кормандони муассисаҳои гуногуни пойтахт бо ҳамовозии самимӣ истиқбол гирифта шуд. Ин аст, ки сокинони пойтахт иқдоми наҷиби раиси шаҳрро хуш пазируфта, аз соати 9-и субҳ ихтиёрӣ ба ҳашари умумишаҳрӣ баромаданд. Шавкат Саидов ҳамзамон афзуд, ки соат ба соат сафи иштирокчиёни ҳашари умумишаҳрӣ меафзояд ва дар назар аст, ки дар он то 10 ҳазор нафар сокинон ва кормандони муассисаю идораҳои гуногуни пойтахт иштирок намоянд.