МОНОПОЛИСТОНИ »ХАМИР»-У «ФАТИР» ҲОЛО ҲАМ ЯККАТОЗӢ МЕКУНАНД

Душанбе, 18 ноябр. (АМИТ «Ховар», Лаззат Диловарзод).- Омӯзиши бозорҳои шаҳри Душанбе нишон дод, ки нонвойхонаҳо ба монополия табдил ёфтаанд. Ин дар суратест, ки рӯзҳои охир як халта орди навъи якум бо нархи 90 — 95 сомонӣ ва як халта орди навъи дуюм бо маблағи 80 — 85 сомонӣ ба Душанбе ворид мешавад. Ба гуфтаи шоҳидоне, ки аз шаҳрҳои Хуҷанду Истаравшан дидан кардаанд, дар ин шаҳрҳо орди навъи якум 80 — 85 сомонӣ ва навъи дуюм 70 — 75 сомонӣ фурӯхта мешавад. Ёдовар мешавем, ки ду моҳ пеш нархи як халта орди навъи якум то 150 сомонӣ боло рафта ва қиммати 1 дона нони 50- дирама ба 1 сомонӣ расида буд, ки то имрӯз ҳамчунон боқӣ мондааст. Ҳалли муаммои мазкурро алҳол касе ба дӯш гирифтанӣ нест. нонвойхонаҳо бошанд чун монополистони «хамир»-у «фатир» яккатозӣ мекунанд.