НАМОЯНДАИ «ГЕДЕОН РИХТЕР» БА КОНФРОНСИ ИЛМИИ ҶТ БАҲОИ БАЛАНД ДОД

       Душанбе, 24 ноябр. (АМИТ «Ховар», Лаззат Диловарзод). — Дар Донишкадаи такмили ихтисоси баъдидипломии кормандони тиби Тоҷикистон конфронси 14-уми илмӣ — амалӣ баргузор гардид.       Конфронсро директори донишкада, профессор Аламхон Аҳмадов ифтитоҳ намуда, аз номи Кумитаи тадорукот, роҳбарият ва кормандони илмӣ ба ҳамаи намояндагони муассисаю ташкилоте, ки дар гузаронидани ин конфронс ҳамкорӣ намудаанд, изҳори миннатдорӣ кард. Ӯ изҳор намуд, ки донишкада дар давоми мавҷудияти худ бештар аз 4000 мутахассисро ба кор омода кард. Дар давоми даҳ моҳи соли ҷорӣ беш аз 400 нафар кормандони соҳа дониши худро такмил доданд.      — Мавзӯъҳои конфронси имрӯза ба он мушкилоте бахшида мешаванд, ки моҳияти таълимоти баъдидипломӣ дар соҳаи тандурустӣ, ҷарроҳӣ, бемориҳои илоҷия ва тифлонро дар бар мегиранд, — афзуд профессор.      Дар конфронс аз рӯи 63 мавзӯъ баромади олимони соҳа шунида шуд. Ба кори конфронс намоядаи «Гедеон Рихтер» дар Ҷумҳурии Тоҷикистон М. Ҷумъаева ва намояндаи ширкати «Пейзер корпаратсион» дар Ҷумҳурии Тоҷикистон профессор С.Шукурова баҳои баланд доданд.