НАЗИР ШАРИФОВ РАИСИ ПАЛАТАИ ТИҶОРАТИИ АМРИКО ДАР ТОҶИКИСТОН ИНТИХОБ ШУД

      Душанбе, 24 ноябр. (АМИТ «Ховар», Фарангис Раҳимова). – Дар Тоҷикистон Палатаи тиҷоратии Амрико расман ба қайд гирифта шуд. Аз Бунёди Евразияи Осиёи Марказӣ дар Тоҷикистон ба мухбири АМИТ «Ховар» доданд, ки Палатаи мазкур ҳамроҳи тоҷирону соҳибкорони маҳаллӣ ҳамчун воситаи густариши тиҷорат ва ҳамкорӣ бо сармоягузорон ва сохторҳои ҳукуматӣ корҳои муҳимро ба сомон мерасонад. Ҳадафи дигари ташкили палата ҷалби сармояи хориҷӣ ба иқтисодиёти Тоҷикистон мебошад.       Роҳбари намояндагии созмони «Тетис» дар Тоҷикистон Назир Шарифов раиси Палатаи тиҷоратии Амрико ва Темур Раҳимов мудири иҷроияи он интихоб шуданд. Палатаи тиҷоратии Амрико баъдан ба шабакаи ҷаҳонии тиҷоратии ИМА ҳамроҳ хоҳад гашт, ки бештар аз се миллион корхонаю муассисаро дар бар мегирад.