«НОРМАН» БА КАСАЛИҲОИ ЗАМБУРӮҒӢ ВА ЗАНГИ ЗАРД ТОБ МЕОРАД

Душанбе, 10 ноябр. (АМИТ  «Ховар»,  Лаззат Диловарзод).- Бино ба гуфтаи президенти Академияи илмҳои кишоварзӣ Ҳукматулло Аҳмадов, гандуми навъи «Норман» ихтирои олимони Пажӯҳишгоҳи зироаткории Тоҷикистон мебошад.            Ин навъи гандум аз соли 2007 бо тавсияи олимон барои кишт дар ноҳияҳои ҷумҳурӣ мавриди истифода қарор дода шуд. «Норман» гандуми навъи дуфасла мебошад. Давраи нашъунамои он ҳангоми кишти тирамоҳӣ 210-220 рӯзро дар бар мегирад. Ҳосилнокии он дар заминҳои обӣ 68-70 с/га-ро ташкил медиҳад, ба касалиҳои замбурӯғӣ ва занги зард хеле тобовар аст. Нуриҳои фосфорӣ ҳангоми кишти тирамоҳии ин навъи гандум як маротиба ба миқдори 60 кг дар як гектар ва ғизои нитрогенӣ дар ду давра – дар вақти панҷазанӣ ва найчаронӣ аз ҳисоби 100 кг дар 1 га дода мешаванд.