ОМОДАГӢ БА ҶАЛАСАИ АССАМБЛЕЯИ ИТТИҲОДИ ИҚТИСОДИИ АВРОСИЁ

             Душанбе, 13 ноябр. (АМИТ «Ховар», Марзия Саидова).-Масъалаҳои омодагӣ ба ҷаласаи Бюро ва Ассамблеяи байнипарлумонии Иттиҳоди иқтисодии АврОсиё, ки рӯзҳои наздик дар шаҳри Санкт-Петербурги Россия баргузор мешавад, мавзӯи асосии мулоқоти Раиси Маҷлиси миллии Маҷлиси Олии ҷумҳурӣ Маҳмадсаид Убайдуллоев ва котиби масъули Бюрои Ассамблеяи байнипарлумонии Иттиҳоди иқтисодии Аврупову Осиё Пётр Зверев буд.               Аз палатаи болоии парлумони мамлакат ба АМИТ «Ховар» иттилоъ доданд, ки ҷонибҳо дар ҷараёни мулоқот масъалаҳои зарурати таҳкиму густариши робита ва ҳамкории минбаъдаи парлумонҳои кишварҳои Иттиҳоди иқтисодии АврОсиёро махсус баррасӣ кардаанд.              Бояд тазаккур дод, ки раиси Маҷлиси миллии Маҷлиси Олии Ҷумҳурии Тоҷикистон Маҳмадсаид Убайдуллоев ҳамзамон Раиси Ассамблеяи Байнипарлумонии Иттиҳоди иқтисодии АврОсиё мебошад.