СТРАТЕГИЯИ РУШДИ ИҚТИСОДИИ ИДМ ТО СОЛИ 2020 ТАСДИҚ ШУД

       Душанбе, 17 ноябр.(АМИТ «Ховар», Марзия Саидова).-Дар фарҷоми ҷаласаи навбатии Шӯрои роҳбарони ҳукуматҳои кишварҳои Иттиҳоди Давлатҳои  Мустақил Стратегияи рушди иқтисодии кишварҳои ИДМ то соли 2020 тасдиқ гардид. Ба ин санади муҳим роҳбарони ҳукуматҳои давлатҳои ИДМ, ки дар Кишинёв -пойтахти Молдова ҷамъ омада буданд, имзо гузоштанд. Ин ҳуҷҷат моҳи октябри соли равон дар Саммити Сарони давлатҳои ИДМ, ки дар  Бишкек баргузор гардид, аз ҷониби сарони кишварҳои ИДМ  маъқул дониста шуда буд.               Дар ҷаласа ҳамчунин роҳбарони  ҳукуматҳои кишварҳои ИДМ масъалаҳои фаъолияти ИДМ –ро дар самти мубориза бо муҳоҷирати ғайриқонунӣ баррасӣ намуда, Конвентсия оид ба мақоми ҳуқуқии  муҳоҷирони меҳнатӣ ва аъзои оилаи онҳоро қабул намуданд. Ҷаласаи ояндаи Шӯрои роҳбарони ҳукуматҳои ИДМ соли 2009 дар пойтахти Қазоқистон –шаҳри Остона гузаронида мешавад.