ТАҶЛИЛИ ЗОДРӮЗИ ОЛИМ ВА ЖУРНАЛИСТИ МАЪРУФ

          Душанбе, 26 ноябр. (АМИТ «Ховар», Людмила Дубинина).- Дирӯз дар Донишгоҳи  славянии Тоҷикистону Россия ба шарафи 60- солагии  олим, омӯзгор ва журналисти маъруф Иброҳим Усмонов ҷамъомади  баргузор гардид. Соҳибҷашнро на танҳо омӯзгорони  Донишгоҳи славянии Тоҷикистону Россия, балки  намояндагони мактабҳои дигари олии мамлакат табрик намуданд. Ба қавли  мудири кафедраи таърих ва назарияи журналистикаи Донишгоҳи славянии Тоҷикистону Россия, профессор Абдусаттор Нуралиев, истеъдоди  касбии  И.Усмонов ҳамчун муҳаққиқ ва рӯзноманигори соҳибтаҷриба  ҳанӯз зимни  таълиф  ва ҳимояи рисолаи дипломӣ дар Донишгоҳи миллии Тоҷикистон зоҳир гардида буд. Бинобар ин  И.Усмонов бо тавсияи Комиссияи давлатии  имтиҳонотӣ ба   шӯъбаи аспирантураи Донишгоҳи давлатии Маскав ба номи М.Ломоносов фиристода шуд. И.Усмонов муҳаққиқи аввалини таърихи  журналистикаи тоҷик буда, дар ин соҳа бисёр асарҳои илмӣ таълиф кардааст. Олимону омӯзгорон, ҳамкорон ва шогирдони соҳибҷашн дар бораи  фаъолияти эҷодии  И.Усмонов сухан ронданд. Қайд карда шуд, ки вай дар баробари фаъолияти илмӣ, инчунин дар хидмати давлатӣ низ саҳми калон дорад.          И.Усмонов вакили Маҷлиси намояндагон, муовини аввали вазири фарҳанги ҷумҳурӣ, узви Комиссияи созгории миллӣ шуда кор кардааст. Мавсуф имрӯзҳо дар тарбияи   журналистони ҷавон саҳми калон мегузорад. И.Усмонов муаллифи беш аз 20 асари илмӣ мебошад. Иброҳим Усмонов дар фарҷоми ҷамъомад ба ҳозирон миннатдорӣ изҳор намуда, барои беҳтар сохтани вазъи соҳаи журналистика дар мамлакат пешниҳодҳои мушаххас ба миён гузошт.