ТАФОҲУМНОМАИ ВАО ВА МАРКАЗҲОИ МАТБУОТӢ БА МНМО ИРСОЛ ГАРДИД

       Душанбе, 19 ноябр. (АМИТ «Ховар», Дилшода Ҷонмардова). — Мактаби мустақили рўзноманигории «Тоҷикистон – асри XXI» амалисозии лоиҳаи «Дастрасӣ ба иттилоот: ҳамкорӣ ва шаффофият»-ро ба анҷом расонид.        Тибқи иттилои сарвари Мактаби рўзноманигорӣ Сафо Сафаров, мақсади асосии тарҳи мазкур баланд бардоштани сатҳи касбият ва ба роҳ мондани ҳамкории самарабахши кормандони расонаҳои хабарӣ ва марказҳои матбуотии мақомоти ҳокимияти иҷроияи Ҷумҳурии Тоҷикистон буд.        Ба гуфтаи сарчашма, ин лоиҳа тўли 6 моҳ амалӣ гардида, зимнан се мизи мудаввари «Ҳамкории ВАО ва марказҳои матбуотӣ: дастовардҳо ва дурнамо», ҳамчунин силсилаи давраҳои омўзишӣ барои 40 нафар рўзноманигорон ва котибони матбуотӣ гузаронида шуд.       — Дар чорабиниҳои лоиҳавӣ намояндагони Дастгоҳи иҷроияи Президенти ҶТ, масъулини марказҳои матбуотии сохторҳои давлатӣ, парлумон ва додгоҳ, кормандони ВАО ва созмонҳои журналистӣ, инчунин, ташкилотҳои ҷамъиятию байналмилалӣ ширкат варзиданд. Аз рўи натоиҷи мизҳои мудаввар «Ёддошти тафоҳум» миёни кормандони марказҳои матбуотии мақомоти давлатӣ ва ВАО-и кишвар ба имзо расида, ҷиҳати омўзишу баррасӣ ба Дастгоҳи иҷроияи Президенти ҶТ ва Маҷлиси намояндагони Маҷлиси Олии ҶТ ирсол карда шуд,- афзуд С. Сафаров.