ТАЪСИСИ ТАШКИЛОТИ МИНТАҚАВӢ МОҲИПАРВАРОНРО АЗ МУШКИЛОТ РАҲО МЕСОЗАД

 Душанбе, 11 ноябр (АМИТ «Ховар», Мавзуна Бойева).- Дирӯз дар Маҷмааи давлатии «Кохи Ваҳдат» мулоқоти намояндагони кишварҳои Арманистон, Озарбойҷон, Гурҷистон, Қазоқистон, Қирғизистон, Туркия, Ӯзбекистон ва Тоҷикистон оид ба баррасии масоили мавҷудаи соҳаи моҳипарварӣ дар минтақа баргузор гардид. Дар маросими ифтитоҳи мулоқот вазири кишоварзии ҷумҳурӣ Қосим Қосимов изҳор дошт, ки вохӯрӣ бо мақсади муҳокимаи имконоти таъсиси ташкилоти минтақавии Осиёи Марказӣ дар соҳаи моҳипарварӣ гузаронида мешавад. «Таъсиси чунин ташкилот ба ҳалли мушкилоти ҷойдошта дар соҳаи моҳипарварӣ дар минтақа мусоидат намуда, идора, тавсеа ва рушди соҳаро таъмин хоҳад кард»,- гуфт ӯ. Мулоқот аз ҷониби Вазорати кишоварзии ҷумҳурӣ ва Созмони ҷаҳонии ғизо ташкил гардида, то 12-уми ноябр идома хоҳад ёфт.