ҒАЛАБАИ 30 – ЮМИ «РЕГАР – ТАДАЗ»

       Душанбе, 10   декабр. (АМИТ «Ховар», Пайрав  Назаров). –  Дар  доираи  мусобиқоти  қаҳрамонии   дастаҳои  футболи  лигаи  олии  мамлакат қувваозмоиҳои  навбатӣ  гузаронида шуданд. Пешсафи  ҷадвали  мусобиқа —  дастаи  «Регар – Тадаз»  ин  дафъа   дар  майдони  худ  бо   дастаи «Равшан» — и  шаҳри  Қӯлоб  қувва озмуда,  онро  бо  ҳисоби  калони  5:2 мағлуб  намуд. Дастаи «Регар – Тадаз»  дар  мавсим  30  ғалаба ба  даст  овард.  Аз  Федератсияи  футболи  мамлакат   ба  АМИТ «Ховар»  хабар  доданд, ки  дастаи  «Динамо» — и  шаҳри  Душанбе  зимни қувваозмоӣ  бо  дастаи  «Энергетик» бо  ҳисоби  0:2 мағлуб  шуд. Дастаи  «Регар – Тадаз»  баъди  37 бозӣ  94  хол  дошта,  барои ба  даст  овардани  унвони  қаҳрамонӣ  мубориза  мебарад. Дастаҳои  «Хуҷанд» ва «Парвоз»  бо  79  ва  78 хол  барои ба  даст  овардани  ҷойҳои  дуюму  сеюм  қувваозмоӣ  мекунанд. Ин  дастаҳо  имрӯзу  пагоҳ  дар  майдонҳои  худ  бо  дастаҳои  «Вахш» ва «Тоҷиктелеком»  қувваозмоӣ  хоҳанд  кард.