ҚАДРДОНИИ ХИЗМАТҲОИ БОБОҶОН ҒАФУРОВ ДАР МАСКАВ

           Маскав, 23 декабр. (АМИТ «Ховар», Ҳалима Хушқадамова).- Дар шаҳри Маскав  190 — солагии  таъсиси Пажӯҳишгоҳи шарқшиносии Академияи илмҳои  Федератсияи Русия ботантана ҷашн гирифта шуд. Иштирокчиёни ҷамъомади  ба ин  муносибат баргузоргардида, дар бораи пешрафти илми  шарқшиносии  шӯравӣ ва саҳми бузурги  олими тоҷик Бобоҷон Ғафуров дар пешрафти  фаъоляти Пажӯҳишгоҳи шарқшиносӣ сухан ронданд.          Директори  пажӯҳишгоҳ Ростислав Рибаков зикр кард, ки  190 — солагии  ин маркази  илми  шарқшиносии шӯравӣ ва Русия бо ифтихори бузург таҷлил карда мешавад. Илми шарқшиносии Русия дар давоми таърихи худ  проблемаҳои гуногуни ҳаёти иҷтимоию иқтисодӣ ва фарҳангии мамлакатҳои шарқро  мавриди омӯзиш  қарор додааст. Р.Рибаков баъдан дар бораи  саҳми калони олимон  дар пешрафти илми шарқшиносӣ сухан ронд. Вай ба хизматҳои калони  Бобоҷон Ғафуров дар ин соҳа баҳои баланд дод.          Мухбири АМИТ «Ховар» хабар медиҳад, ки дар ҷамъомад барқияи шодбоши раиси Академияи илмҳои Ҷумҳурии Тоҷикистон Мамадшо Илолов низ қироат карда шуд.