ҲУКУМАТИ ҶУМҲУРӢ ДАР НАЗДИ ОЛИМОН ВАЗИФА ГУЗОШТ

             Душанбе, 29 декабр. (АМИТ «Ховар», Лаззат Диловарзод).- Бино ба гуфтаи узви вобастаи Академияи илмҳои кишоварзии Тоҷикистон профессор Ҳукматулло Аҳмадов, картошкапарварӣ соҳаи муҳими кишоварзӣ буда, рушди минбаъдаи он ба ташкили дурусти илман асосноки тухмипарварӣ вобаста аст. Солҳои зиёд картошкапарварӣ дар ҷумҳурии мо аз ҳисоби тухмии мамлакатҳои дигар ба роҳ монда мешуд. Ҳукумати ҷумҳурӣ дар назди олимони соҳа вазифа гузоштааст, ки ҳарчи зиёдтар навъҳои нави картошкаи маҳаллӣ ба вуҷуд оварда, дар ноҳияҳои иқлимашон барои парвариши ин зироат мувофиқ тухмипарвариро ба роҳ монанд. Ҳоло дар хоҷагиҳои ҷумҳурӣ парвариши навъҳои картошкаи «Лорх», «Невский», «Кардинал», «Космос», «Пикасо», «Кондор», «Зарина» ва «Жуковский» тавсия карда шудаанд.  Ин навъи картошкаҳоро барои кишти такрорӣ ҳам истифода бурдан мумкин аст.