ҶАМЪБАСТИ ОЗМУНИ КИТОБДОРОНИ ВИЛОЯТ

         Хуҷанд, 3  декабр. (АМИТ «Ховар»,  Санавбар  Мақсудова). – Дар  китобхонаи  вилоятии  оммавии   ба  номи  Тошхоҷа  Асирӣ  озмуни  «Китобдори  беҳтарини сол» ҷамъбаст  карда шуд. Дар  он  кормандони   китобхонаҳои  даҳ  шаҳру  ноҳияи  вилояти  Суғд  ширкат  варзиданд.  Ороиши   газетаи  рӯзномаи  деворӣ  бахшида ба   санаҳои  гуногуни  таърихӣ, тартиб  додани  нақшаи  мухтасари  ин  ё  он  маъракаи  фарҳангӣ ва  гайра  аз  ҷумлаи   шартҳои  озмун  буданд.          Ҳайати  доварон  ба  маҳорати  кормандони  китобхонаҳо  баҳои  сазовор  дод.  Аз  рӯи  натиҷаҳои  озмун  ҷоизаи  асосии  он  насиби  корманди  китобхонаи  марказии  ноҳияи  Бобоҷон  Ғафуров,  Дилафрӯз  Шарифбобоева  гардид. Ҳайати  доварон  ба  маҳорати  касбии  намояндагони  ноҳияи  Конибодом  ва  шаҳри  Хуҷанд  низ  баҳои  хуб  дод. Ба қавли  ташкилкунандагони  озмун,  чунин  тадбирҳо  ба  такмили  маҳорати  кормандони  китобхонаҳо  мусоидат  мекунад.