4 МИЛЛИОНУ 900 ҲАЗОР ДОЛЛАР БАРОИ СОХТМОНИ 4 НЕРӮГОҲ

Душанбе, 27 декабр. (АМИТ «Ховар», Лаззат Диловарзод).- Бо мақсади таъмини аҳолии ноҳияи Дарвоз бо барқ Барномаи сохтмони нерӯгоҳҳои хурди барқи обӣ ба роҳ монда шудааст. Аллакай сохтмони нерӯгоҳҳои хурди барқи обӣ дар деҳаҳои Шкев ва Ёгед ба охир расида, мавриди истифодабарӣ қарор гирифтаанд. Интиқоли барқи 35 кВт-аи Сағирдашт-Қалъаихумб, хатти барқи 10 кВт-аи Қалъаихумб-Нулванд, Қалъаихумб-Пошхарв таъмин гардид.  То соли 2015 сохтмони боз 4 нерӯгоҳи хурди барқӣ бо арзиши 4 млн. 900 ҳазор доллар пешбинӣ шудааст. Дар деҳаҳои Ширг ва Паткнов, Зиғар ва Курговад сохтмони нерӯгоҳҳои хурди барқи обӣ то соли 2012 ба нақша гирифта шудааст. Дар сурати то соли 2012 пурра ба истифода додани ҳамаи нерӯгоҳҳои хурди барқи обӣ ва азнавсозии шабакаи барқи обии ноҳия истеҳсоли қувваи барқ дар ноҳии Дарвоз ба 18 млн.кВт мерасад, ки барои таъмини аҳолӣ ва корхонаҳои саноатии ноҳия басанда хоҳад буд.