АҲМАД ДУЙСЕНБОЕВ ШОҲКОРИҲОИ МОРО БА РУСҲО МУАРРИФӢ МЕКУНАД

Душанбе,1 декабр. (АМИТ «Ховар», Бекназари Абӯбакр). — Дар Қазоқистон китоби «Ашъор ва зиндагии устод Рӯдакӣ» нашр шуд. Ин китоб бо ибтикори ношир ва таблиғгари адабиёти тоҷику форс Аҳмад Дуйсенбоев бо ороиши ҷолибу муқоваи  хуб ва  воқеан нодир нашр шудааст. Аҳмад Дуйсенбоев  тайи се соли охир ду шоҳкории дигари адабиёти тоҷику форсро ба хонандагони русзабон пешкаш кардааст. Аз ҷумла, «Қобуснома», «Синдбоднома» ва «Афсонаҳо»-ро дар як китоб ва дар китоби дигар  «Гулистон»-и Шайх Саъдӣ, «Баҳористон»-и Мавлоно Абдураҳмони Ҷомӣ ва  «Тӯтинома»-и  Зиёвуддини Нахшабиро ба нашр расонидааст. Бояд ёдовар шуд, ки соли ҷорӣ дар Қазоқистон ба муносибати 1150-солагии устод Рӯдакӣ  китоби ашъори Одамушшуаро низ дастраси хонандагон гардида буд.