БӮҲРОНИ ҶАҲОНИИ МОЛИЯВӢ БА ИҚТИСОДИЁТИ ҶТ ЗИЁН МЕРАСОНАД

          Душанбе,  12  декабр.(АМИТ «Ховар», Лутфия  Эшонқулова). – Имрӯз  зимни  машварати   дар Иттифоқи  журналистони Тоҷикистон  баргузоргардида  масъалаи бӯҳрони  ҷаҳонии  молиявӣ ва  таъсири  он  ба иқтисодиёти  Тоҷикистон  мавриди баррасӣ қарор дода шуд.   Дар он  намояндагони  ташкилоту  муассисаҳои  молиявӣ,  аз  ҷумла,  вазоратҳои  молия,  рушди  иқтисод ва  савдо,  Пажӯҳишгоҳи  тадқиқоти иқтисодӣ,  Маркази тадқиқоти стратегии  назди  Президенти  Ҷумҳурӣ ва журналистон  ширкат  варзиданд. Ҳадафи  асосии  машварат  огоҳ  кардани   аҳолӣ аз   бӯҳрони  ҷаҳонии  молиявӣ ва имкониятҳои  зарари он  ба  иқтисодиёти  Тоҷикистон  мебошад. Мутахассиси вазорати  рушди  иқтисод ва  савдои ҷумҳурӣ  Зӯҳро Мӯсоева  дар  бораи  бӯҳрони ҷаҳонии  молиявӣ  маълумоти  муфассал  дода,  зикр  намуд, ки он ба  иқтисодиёти  Тоҷикистон  низ  зарари  манфӣ  расонид.  Ин  пеш  аз  ҳама  дар  паст  гардидани нархи  молҳои  содиротии  мамлакат  —  пахта ва  алюминий  равшан  зоҳир  мегардад. Намояндаи  вазорати  молия  Ҷамшед  Шерматов  ин  мавзӯъро  давом  дода,  изҳор  намуд, ки  соли  2009  дар  ҷумҳурӣ  барои  пешгирии  чунин  вазъият  фонди  махсус  ташкил  карда  мешавад.  Зикр  гардид, ки  имрӯз дар  ҳамаи ташкилоту муассисаҳои  молиявӣ  барои  пешгирии  зарари  бӯҳрони  молиявӣ  ва  бартараф  сохтани оқибатҳои он  комиссияҳои  махсус  ташкил  карда  шудаанд.