БАЗМГОҲИ АСОСИИ ИСТИҚБОЛИ СОЛИ НАВИ 2009 МАЙДОНИ «ДӮСТӢ» АСТ

Душанбе, 16 декабр.(АМИТ «Ховар», Марзия Саидова).-«Дар асоси қарори ба тасвиб расонидаи раиси шаҳри Душанбе Маҳмадсаид Убайдуллоев чорабиниҳои идонаи солинавӣ дар пойтахт дар майдони асосии мамлакат – майдони «Дӯстӣ» гузаронида мешавад», — гуфт дар сӯҳбат ба хабарнигори АМИТ «Ховар» мудири шӯъбаи фарҳанги шаҳри Душанбе Шаҳло Мӯсоева. Дар ин ҷо, аз соати 8-и шом то 10 шаб бо иштироки ситораҳои шинохтаи эстрадаи тоҷик барномаи калони консертӣ баргузор гардида, баъдан ба шарафи истиқболи сазовори Соли нави мелодии 2009 муддати даҳ дақиқа ба фазо мушакҳои идона сар дода мешаванд. 27 –уми декабр соати даҳ дар толори Сирки давлатии Душанбе чорабинии идонаи солинавӣ барои кӯдакон ва наврасони пойтахт гузаронида мешавад, ки коргардони ин базмгоҳ Набӣ Ҷалолов аст. Дар ин ҷо тарбиятгирандагони кӯдакистонҳо, хона-интернатҳои пойтахт барномаҳои ҷолиби солинавиро бо иштироки Бобои Барфӣ,  Барфак ва қаҳрамонҳои афсонавӣ тамошо карда, дар гирди Арчаи солинавӣ шеъру тарона мехонанд.Ҳамзамон, барои сокинон ва меҳмонони Душанбе дар чор боғи фарҳангу фароғатии  шаҳр –боғи «Дӯстии халқҳо», боғи фарҳангу фароғатии ба номи устод Айнӣ, майдони «800-солагии Москва» ва «Кӯли ҷавонон» аз соати 12 то 14-и 31-уми  декабр сайругашти идона ташкил карда шуда, беҳтарин дастаҳои ҳунарии эстрадии пойтахт консерт намоиш медиҳанд. Инчунин,  бо мақсади пурнозу неъмат гардонидани дастархони идонаи сокинони пойтахт,  дар бозорҳои шаҳр намоиш-фурӯши маҳсулоти кишоварзӣ ва молҳои дигари ниёзи мардум ташкил карда мешавад,-  афзуд дар анҷом. Ш Мӯсоева.