БО ИШТИРОКИ САРВАРИ ДАВЛАТ МАВСИМИ НАВИ НИҲОЛШИНОНӢ ОҒОЗ ЁФТ

         Чунонки таҷриба нишон медиҳад, дар иқлими муътадили Тоҷикистон охири фасли тирамоҳ ва аввали зимистон аз ҳама вақти мусоид барои оғози мавсими нави ниҳолшинонӣ аст. Бо риояи ин анъанаи накӯи бобоӣ бо иштироки Президенти Ҷумҳурии Тоҷикистон Эмомалӣ Раҳмон мавсими нави ниҳолшинонӣ ва корҳои кабудизоркунии муҳити зист ба таври оммавӣ оғоз ёфт.         Гурӯҳи наворбардори мо шоҳиди ҳашари серодами ниҳолшинонӣ дар назди Қасри Миллат, Кохи Истиқлол ва чандин мавзеъҳои дигари шаҳри Душанбе гашт, ки бо ташаббуси Президенти Ҷумҳурии Тоҷикистон Эмомалӣ Раҳмон сурат гирифт.        Сарвари давлат Эмомалӣ Раҳмон дар назди Қасри миллат ниҳолҳои сояафкану ороишӣ, аз қабили сарву санавбар, булут, кипариси аризонӣ ва ғайра шинонда, шахсан дар оғози мавсими нави ниҳолшинонӣ ва корҳои кабудизоркунии муҳити зист фаъолона иштирок кард.          Бояд махсус таъкид намуд, ки ниҳолшинонию боғдорӣ ва парвариши навъҳои гуногуни меваю сабзавот аз оинҳои бостонӣ ва пурифтихори ниёгони ориёии мост, ки аз ҷониби Президенти Ҷумҳурии Тоҷикистон Эмомалӣ Раҳмон пайваста мавриди арҷгузорӣ, пайравӣ ва тарғибу ташвиқи васеъ қарор мегирад.         Мавриди эътимоду боварист, ки ташаббусу пешкории имрӯза ба оғози мавсими нави ниҳолшинонӣ дар тамоми шаҳру ноҳияҳои кишвар, ки иқлими муътадилу мусоид доранд,  боис мегардад.