БОЗДИДИ СОҲИБКОРОНИ УКРАИНА АЗ ВИЛОЯТИ ХАТЛОН

                 Қӯрғонтеппа, 22 декабр. (АМИТ «Ховар», Мурод Сотиев). — Гурӯҳи намояндагони корхонаҳои саноатӣ ва соҳибкорони Украина таҳти роҳбарии муовини волии вилояти Харков Олег Шаповалов барои боздиди корӣ ба вилояти Хатлон омад. Меҳмонон бо раиси вилояти Хатлон Ғайбулло Авзалов ва раиси шаҳри Кӯлоб Ҳамид Абдуллоев мулоқот карданд. Ҳадафи сафари онҳо шиносоӣ бо вазъи иқтисодии минтақа, омӯхтани имконияти ба роҳ андохтани равобити иқтисодӣ ва имзои қарордодҳои ҳамкорӣ бо корхонаҳои вилоят мебошад.                 Мухбири АМИТ «Ховар» хабар медиҳад, ки айни ҳол дар Кӯлоб 22 корхонаи калони саноатӣ фаъолият дорад. Онҳо дар давоми 9 моҳи соли равон ба маблағи 277 миллион сомонӣ маҳсулот бароварданд. Ба қавли коршиносон, ҳамкорӣ бо мамлакатҳои дигар ба афзун гардондани маҳсулоти саноат ва бо кор таъмин намудани аҳолӣ аҳамияти калон дорад.