ЧАРО КОРФАРМОЁН ТАЛАБОТИ КОДЕКСИ МЕҲНАТРО РИОЯ НАМЕКУНАНД?

         Душанбе, 16 декабр. (АМИТ «Ховар», Жасмин Назарова).- Бино ба гуфтаи сардори шӯъбаи муҳофизати меҳнат ва рушди шарикии иҷтимоии Раёсати муносибатҳои меҳнатии Вазорати меҳнат ва ҳифзи иҷтимоӣ Маҳмадсафар Асоев, дар натиҷаи санҷишҳо аз тарафи корфармоён риоя нашудани талаботи қонунгузорӣ оид ба меҳнат, ҳифз ва бехатарии он, риоя нашудани шартномаҳои коллективӣ ошкор карда шудааст. Дар натиҷаи санҷишҳо 253 ҳолати риоя нашудани гузаштан аз муоинаи тиббӣ дар соҳаи истеҳсолоти маҳсулоти саноатӣ ва фурӯши маҳсулоти хӯрокворӣ ошкор шуд. Ҳамчунин, 242 ҳолати риоя нашудани талаботи ҳифзи меҳнат, 217 ҳолати таъмин накардани имтиёз ва ҷуброн барои кормандони шароити корашон зарарнок маълум гардид. Дар маҷмӯъ, қариб чоруним ҳазор ҳолати қонунвайронкунӣ дар соҳаи меҳнат аз тарафи корфармоёни корхона, муассисаю ташкилоти ҷумҳурӣ муайян гардида, барои чораҷӯӣ ва ислоҳи камбудиҳо ба роҳбарони муассисаю корхонаҳо дастуру санад ирсол карда шудааст.