ЧАРО «СУҒДИЁН»-У «ҲИСОР» БАРОИ ТУХМӢ ҶУДО КАРДА НАМЕШАВАНД?

                 Душанбе, 17 декабр. (АМИТ «Ховар», Лаззат Диловарзод).- Ба гуфтаи мудири кафедраи селексия, генетика ва пахтакории Донишгоҳи аграрии Тоҷикистон Салимбек Расулов, барои пахтакориро ба соҳаи сердаромад табдил додан, корро аз кишти техникии он шурӯъ кардан зарур аст.                Дар давлатҳои соҳаи пахтакориашон пешрафта дар 1га замини пахта ҳамагӣ 20 — 25 кг пунбадона кишт карда мешавад. Дар шароити феълии Ҷумҳурии Тоҷикистон бошад, дар 1га аз 80 то 120 кг чигити пахтаи миёнанах ва то 60 кг чигити пахтаи маҳиннах кишт карда мешавад, ки дар ин ҳол хоҷагиҳо пеш аз ҳама фоидаи иқтисодиро бо харҷи зиёди тухмӣ аз даст медиҳанд. Аз тарафи дигар, кори ягонакунӣ боиси меҳнати иловагӣ ва маблағгузории зиёдатӣ мегардад.                Олимони соҳаи кишоварзӣ навъҳои пахтаи серҳосили «Ҳисор» ва «Суғдиён»-ро, ки то 50-сентнерӣ аз ҳар гектар ҳосил дода метавонанд, ба вуҷуд оварданд. Аммо бо сабаби дуруст ташкил накардани соҳаи тухмипарварӣ, чигити ин навъҳо барои тухмӣ ҷудо карда намешавад.