ДАР АМРИКО 1150-СОЛАГИИ РУДАКИРО ҶАШН ГИРИФТАНД

                 Душанбе, 19 декабр. (АМИТ «Ховар», Наргис Бойаҳмадова).- Бо ташаббуси Намояндагии доимии ҶТ дар Созмони Милали Муттаҳид дар донишгоҳи бузургтарини шаҳри Ню-Йорк-Колумбиё дар мавзӯи «Ҳаёт, эҷодиёт ва ашъори сардафтари адабиёти классикии форсу тоҷик Абӯабдуллоҳи Рӯдакӣ» мизи мудаввар баргузор гардид.                Тавре ба АМИТ «Ховар» аз Вазорати корҳои хориҷии ҶТ хабар доданд, дар ин чорабинӣ олимони шинохтаи Амрико, аз ҷумла профессор ва раиси Маркази эроншиносии Донишгоҳи Колумбиё Эҳсон Ёршотир, профессори Донишгоҳи давлатии Оҳайё Парвона Пуршариати, профессори Донишгоҳи Сан Ҷони шаҳри Ню-Йорк Ҳабиба Раҳим ва дигарон иштирок намуданд.                 Профессорон Ёршотир ва Таботабоӣ бо хондани даҳҳо қасидаву шеърҳои Рӯдакӣ конфронсро ба як фазои рӯдакишиносӣ табдил доданд, ки ин ба тамоми иштирокчиён хуш омад. Иштирокчиён аз Намояндагӣ хоҳиш карданд, ки минбаъд дар якҷоягӣ бо шарқшиносон ва Маркази эроншиносии Донишгоҳи Колумбиё чунин маъракаҳоро бештар баргузор намояд.                  Намояндагӣ ба ҳамаи интирокчиёни конфронс брошюраҳо оид ба ҳаёт ва эҷодиёти Рӯдакӣ ва китобчаҳои ашъори Рӯдакиро бо забонҳои форсию англисӣ такдим кард.