ДАР ИДИ «МЕҲРГОН» КИШОВАРЗОН СОҲИБИ ТӮҲФА ШУДАНД

        Кӯлоб, 24 декабр. (АМИТ «Ховар», Сулаймон Холов).- Дар Кӯлоб нахустин бор иди «Меҳргон» бо шукӯҳу шаҳомати хос истиқбол гирифта шуд. Раиси шаҳри Кӯлоб Ҳамид Абдуллоев зимни муборакбодии кишоварзон гуфт, ки ҷашнгирии «Меҳргон» аз суннатҳои қадими миллати тоҷик буда, дар гузаштаи дур фасли тирамоҳ истиқбол гирифта мешуд. Шоҳони сосонӣ охири тирамоҳ фаъолияти яксолаи кишоварзонро натиҷагирӣ намуда, захираи анбори худро ҳисоб мекарданд.         Раиси шаҳр афзуд: «Имсол аз ҳарсола дида ба истиқболи иди ҳосилот сазовортарем, зеро анқариб ҳамаи нақшаҳои меҳнатиро барзиёд иҷро кардем». Аз ҷониби ҳокимияти маҳаллӣ ба кишоварзон тӯҳфаҳои моливу пулӣ тақдим гардид. Онҳое, ки дар иҷрои нақшаи пахтасупорӣ саҳми босазо гузоштаанд, бо тӯҳфаҳои қиммат, аз ҷумла, телевизор ва қолин сарафроз гаштанд.