ДИРЕКТОРИ ХОҶАГӢ БО САБАБИ ХУНУКНАЗАРИЯШ ҶАЗОИ ИНТИЗОМӢ ГИРИФТ

          Душанбе, 15 декабр. (АМИТ «Ховар», Лаззат Диловарзод).- Бо  фармони директори Муассисаи давлатии хоҷагии ҷангал ва шикори Ҷумҳурии Тоҷикистон, баҳри иҷрои «Барномаи рушди хоҷагии ҷангал барои солҳои 2006- 2015» дар мавзеи «Сайёд»-и ноҳияи Данғара 2 ҳазор гектар ҷангал бунёд карда мешавад. Дар ин мавзеъ ба хоҷагии ҷангали ноҳияи Файзобод 100 га замин вобаста карда шудааст. Коргарони хоҷагии ҷангали Файзобод дар мавзеи вобастакардашуда 6 ҳазору 150 бех ниҳоли арча, олуча, чормағз, акатсия ва дигар ниҳолҳои босамару сояафкан шинонидаанд. Аз ниҳолҳои шинонидашуда соли 2006 83 фоиз ва соли 2007 65 фоизашон сабзидааст. Бо сабаби бемасъулиятии кормандони хоҷагии ҷангали ноҳия ва хунукназарии директори хоҷагӣ нисбати таъмини сабзиши 100-фоизаи   ниҳолҳо, директори ин хоҷагӣ Р. Одинаев аз ҷониби Муассисаи хоҷагии ҷангал ва шикори Ҷумҳурии Тоҷикистон ҷазои интизомӣ гирифт.