ДУХТАРОНИ ТОРБОЗ, ШУТУР, ХАР ВА 3 МОР ДАР СИРК БАРОМАД МЕКУНАНД

Душанбе, 4 декабр. (АМИТ «Ховар», Лутфия Эшонқулова). – 26-уми  декабр дар Сирки давлатӣ барномаи нави солинавӣ оғоз меёбад. Тавре ба АМИТ «Ховар» муовини директори Сирк Давлат Сафаров иброз дошт, барномаи имсолаи таҳиянамудаи ҳунармандони сирк васеъ буда, аз барномаи порсола ба куллӣ фарқ мекунад. Дар он баромади «Духтарони торбоз», «Тори озод», «Песр» ва  баромади анъанавии «Ҷуфти гимнастҳо дар тасма», «Гимнаст дар ҳалқа», аттраксиони ҳайвонҳо ва масхарабозҳо дохил мешаванд.  Барномаи мазкур бо роҳбарии директори студияи ҳунарҳои сиркӣ Ашӯр Раҷабов таҳия шудааст. Баромади «Духтарони торбоз»- ро аввалин маротиба дар таърихи сирки тоҷик  танҳо духтарон иҷро менамоянд. Дар аттраксион ҳайвонҳои нав – шутур, хар ва 3 мори калон (анаконда) истифода бурда мешаванд. Ба қавли Давлат Сафаров, имрӯз ҳунармандони сиркро ҷавонон ташкил намуда, ҳамаи онҳо  хатмкарда ва тарбиятгирандагони студияи ҳунарҳои сиркӣ мебошанд. Бояд зикр намуд, ки студияи мазкур аз соли 2002  фаъолият дошта, аллакай 20 мутахассис тайёр кардааст. 7-уми декабр ҳайати доварон бо роҳбарии вазири фарҳанги ҶТ Мирзошоҳрух Асрорӣ барномаро тасдиқ мекунанд.