ФАРОНСА БАРОИ СОХТМОНИ ТЕРМИНАЛИ НАВИ МАЙДОНИ ҲАВОИИ ДУШАНБЕ МАБЛАҒ ҶУДО МЕКУНАД

           Душанбе,1 декабр. (АМИТ «Ховар», Покиза Маҳмадбекова).- Дар Вазорати молияи ҷумҳурӣ маросими имзои созишнома дар бораи додани қарзи имтиёзноки  Хукумати Фаронса  барои сохтмони терминали нави майдони ҳавоии  байналхалқии шаҳри Душанбе баргузор гардид. Мувофиқи созишнома  Ҳукумати  Фаронса ба Тоҷикистон бо ин мақсад 17 миллион  евро қарз медиҳад. Мӯҳлати баргардонидани қарз 35 сол буда, фоидаи солонаи он  0,15 фоиз ва давраи имтиёзноки  он  20 солро ташкил медиҳад. Барномаи сохтмони майдони ҳавоӣ дар давоми ду сол иҷро карда мешавад. Маблағи қарз барои сохтмони  терминали  нави  майдони ҳавоии байналхалқии шаҳри Душанбе сарф карда мешавад.