ГУЗАШТАН БА МТС-ҲО АЗ ЗАРУРАТ АСТ, Ё ЗӮРОМАД?

             Душанбе, 15 декабр. (АМИТ «Ховар», Лаззат Диловарзод).- Гузаштан ба шакли нави хоҷагидорӣ боиси таллаю тороҷ шудани техникаи кишоварзӣ гардид. Соли 2007 шумораи умумии тракторҳои қобили истифода 11 ҳазору 14 адад ва дар соли 2008 10 ҳазору 89 ададро ташкил дод. Бо мақсади қонеъ кардани талаботи аҳолӣ бо маҳсулоти кишоварзӣ, ҳамасола заминҳои нав ба кор дароварда мешавад, аммо на дар ҳамаи хоҷагиҳои деҳқонӣ (фермерӣ) тракторҳои шудгоркунанда ба таври кофӣ мерасанд. Баҳри таъмини хоҷагиҳо бо техника, дар ҷумҳурӣ Корхонаи воҳиди давлатии «Тоҷикагролизинг» таъсис  ёфт. Тавассути корхонаи навтаъсис дар ноҳияи Рашт бо 8 трактори шудгоркунанда МТС ташкил карда шуд, ки нархи кирояи онҳо ду баробар нисбат ба тракторҳои соҳибкорони хоҷагиҳо арзон аст.  Соли 2009 барои таъмини бештари техника дар ноҳия чораҳои зарурӣ андешида мешавад. Бояд дар асоси маблағи пешпардохт ба МТС техникаи кишоварзӣ ворид гардад. Ташкили МТС дар шароити имрӯза роҳи дурусти пешбурди хоҷагиҳо мебошад,- иброз дошт раиси ноҳия М. Толибов ба мухбири АМИТ «Ховар».