ИМТИЁЗҲО БАРОИ МАЪЮБОН ДАР КОДЕКСИ АНДОЗ

           Душанбе, 3 декабр. (АМИТ «Ховар», Людмила Дубинина).- Сардори Раёсати таҳқиқи проблемаҳои соҳаи  иҷтимоӣ ва бозори меҳнати Маркази тадқиқоти стратегии назди Президенти Тоҷикистон Фирӯз Саидов  дар арафаи таҷлили Рӯзи байналхалқии маъюбон зикр намуд, ки  дар Тоҷикистон ба шахсони маъюб баробари ҳамаи шаҳрвандони дигар дар бобати таъмини ҳуқуқу озодиҳои онҳо  ҳуқуқҳои баробар дода шудааст. Вале қонуни Ҷумҳурии Тоҷикистон «Дар бораи ҳифзи  иҷтимоии маъюбон» бо сабаби набудани маблағ самарабахш истифода бурда намешавад. Инчунин дар мамлакат марказҳои  барқарор сохтани саломатии маъюбон вуҷуд надоранд ва онҳо дар корхонаҳо бо кор таъмин карда намешаванд.         Номбурда зикр намуд, ки  шароити муассисаҳои махсуси  табобати маъюбон ба талаботи имрӯза мувофиқ нестанд. Инчунин фаъолияти бисёр хона — интернатҳо бо сабаби набудани маблағ ниҳоят душвор гардидааст. Баъзеи онҳо барои бартараф сохтани душвориҳои моддӣ хоҷагиҳои ёрирасон ташкил намуда, бо парвариши  чорвою мурғ, занбӯри асал ва  ташкили гармхонаҳо машғул мешаванд. Ин тадбирҳо таъминоти  маъюбонро бо озуқа то андозае беҳтар менамояд.            Муовини сардори Раёсати таҳқиқи  проблемаҳои соҳибкорӣ ва  рушди сектори хусусии Маркази мазкур Баҳор Қамаров зикр кард, ки  дар Кодекси андози Тоҷикистон барои маъюбон силсилаи имтиёзҳо  пешбинӣ шудаанд. Аз ҷумла  аз маблағи барои хизматрасонии маъюбони гурӯҳҳои якум ва дуюм пешбинишуда андоз гирифта намешавад. Ин дар давоми як моҳ қариб ба 250 сомонӣ мерасад. Инчунин маъюбоне, ки кор мекунанд, аз пардохти андози арзиши илова озод карда шудаанд. Илова бар ин шахсони маъюб аз пардохти андози замин, андози хариди қитъаи замини назди ҳавлӣ ва  қитъаи замин барои сохтани иморат низ озод мебошанд. Ба қавли коршиносони Марказ, ин шароитҳо барои  фаъолияти фардии  соҳибкорони маъюб шароити мусоид  муҳайё месозанд.