ИСТЕҲСОЛИ МОШ ДАР ҲАМАИ ЗАМИНҲОИ ОБӢ ИМКОНПАЗИР АСТ

          Душанбе, 16 декабр. (АМИТ «Ховар», Лаззат Диловарзод).- Ба ақидаи олимони соҳаи қалбшиносӣ, мош барои кори дил ва рагҳои хунгард аҳамияти калон дорад. Аз мош хӯрокҳои гуногуни серғизо тайёр карда мешавад. Дар таркиби мош 28 фоиз сафеда, 3,4 фоиз равған, 3,2 фоиз оҳар ва 6,4 фоиз қанд мавҷуд аст. Ин зироатро дар ҳамаи заминҳои обии минтақаҳои ҷумҳурӣ истеҳсол кардан мумкин аст. Нашъунамои мош муддати кӯтоҳро дар бар мегирад. Он ба гармии ҳаво тобовар аст. Мошро дар кишти такрорӣ баъд аз зироатҳои ғалладона, сабзавотӣ ва картошкаи барвақтӣ истифода мебаранд. Мош ба намии замин ва об талаботи зиёд дошта, ҳосили хуб медиҳад. Дар ҷумҳурӣ ду навъи мош — «Тоҷикӣ-1» ва «Тоҷикӣ -2», ки офаридаи Пажӯҳишгоҳи зироаткорӣ мебошанд, ноҳиябандӣ шудаанд.