КӮҲҲО ДИҚҚАТИ ҶОМЕАИ ҶАҲОНИРО ҶАЛБ КАРДААНД

          Душанбе, 11 декабр. (АМИТ «Ховар», Марзия Саидова).- 11-уми декабр ҷомеаи ҷаҳонӣ Рӯзи байналмилалии кӯҳро таҷлил менамоянд.   Лозим ба ёдоварист, ки 5 сол муқаддам, 11-уми декабри соли 2003 дар Ассамблеяи Генералии Созмони Милали  Муттаҳид дар ин хусус қарор қабул гардид. Ин иқдом аз ҷониби Асамблеяи Генералии СММ бо мақсади рушди минтақаҳои кӯҳистон андешида шудааст. Дар ин рӯз дар аксар кишварҳои ҷаҳон бо мақсади рушди минтақаҳои кӯҳӣ чорабиниҳои гуногун гузаронида мешавад. Бояд зикр намуд, ки аз чор як қисми рӯи заминро кӯҳҳо ташкил медиҳанд, ки он баробар ба 20 фоизи минтақаҳои аҳолинишин аст. Ҷумҳурии Тоҷикистон дар харитаи ҷаҳон ҳамчун кишвари кӯҳистон шинохта шудааст. 93 фоизи ҳудуди кишварамонро кӯҳҳо ташкил медиҳанд. Яке аз қуллаҳои баландтарини ҷаҳон — қуллаи Исмоили Сомонӣ, ки бо номи «Боми ҷаҳон» машҳур аст, дар ҳудуди Тоҷикистон ҷойгир буда, 7 ҳазору 495 метр баландӣ дорад.