КӮМАКИ КОМИССИЯИ АВРУПО БА АҲОЛИИ ВОДИИ ЗАРАФШОН

                     Душанбе, 18 декабр. (АМИТ «Ховар», Наргис Бояхмедова ). — Созмони кишоварзии Олмон дар доираи барномаи Комиссияи Аврупо таҳти унвони «Муҳити зист ва идораи самарабахши захираҳои табиӣ, аз ҷумла, манбаъҳои қувваи барқ» ба аҳолии водии Зарафшон барои мавриди истифода қарор додани манбаъҳои барқароршавандаи энергия кӯмак мерасонад. Созмони мазкур дар ин ҷо барномаро бо номи «Самаранокии истифодаи энергия дар хоҷагиҳои шахсӣ ва истифодаи манбаъҳои барқароршавандаи энергия» — ро амалӣ месозад. Барномаи мазкур аз 1 январи соли 2009 оғоз ёфта, то моҳи июни соли 2011 давом мекунад.                    Ҳадафи асосии ин барномаҳо беҳтар сохтани шароити зиндагии аҳолии камбизоати ду ноҳияи водии Зарафшон — ноҳияҳои Айнӣ ва Кӯҳистони Мастчоҳ мебошад. Барои иҷрои барнома бештар аз 805 ҳазор евро ҷудо карда шудааст. Ин маблағ асосан барои истифода бурдани манбаъҳои ғайримуқаррарии қувваи барқ дар хоҷагиҳои шахсӣ ва муассисаҳои иҷтимоӣ сарф карда мешавад.