КИТОБИ СИЁСИВУ ФАРҲАНГӢ ВА ИҶТИМОИИ ПРОФЕССОР АЗ ЧОП БАРОМАД

         Душанбе, 15 декабр. (АМИТ «Ховар», Лутфия Эшонқулова).- Нашриёти «Деваштич» китоби нави доктори илмҳои филология профессор Худойназар Асозодаро аз чоп баровард. Китоб «Достони зиндагӣ» ном дошта, ҷилди сеюми хотираҳои давраи донишгоҳи муаллиф мебошад, ки бо сабки равону дилчасп қаламдод шудаанд. Дар ин китоб хонанда бо воқеаҳои сиёсиву фарҳангӣ ва иҷтимоии даҳ соли охири асри XX ва як қатор чеҳраҳои хотирмони ин солҳои пурошӯб ошно мегардад. Бояд зикр намуд, ки Худойназар Асозода дар баробари таълифи асарҳои илмӣ ба навиштани китобҳои оммавию маърифатӣ ҳам машғул аст. «Зиёрати Каъбатуллоҳ», «Ёде аз дӯсти ҷавонмардам», «Афғонистони шоҳӣ», «Афғонистони инқилобӣ» аз беҳтарин намунаҳои насри мустанади ӯ мебошанд.