М. УБАЙДУЛЛОЕВ: «РАИСҲО, НАЗОРАТРО ПУРЗӮР НАМОЕД!»

           Душанбе, 30 декабр. (АМИТ «Ховар», Марзия Саидова).- Бо мақсади тақвияти нақши институти ҷамъиятӣ ҷиҳати баланд бардоштани сатҳи риояи фарҳанги шаҳрдорию шаҳрнишинии сокинони пойтахт, моҳҳои январ, феврал ва март дар пойтахт  интихоботи озоду кушоди раисони шӯрои шаҳраку маҳаллаҳо доир карда мешавад,- зикр гардид дар ҷаласаи навбатии мақомоти иҷроияи ҳокимияти давлатии шаҳри Душанбе, ки таҳти раёсати раиси шаҳри Душанбе Маҳмадсаид Убайдуллоев баргузор шуд.           Ҳамзамон, Маҳмадсаид Убайдуллоев бо дахли масъалаи риояи қонунгузории кишвар оид ба танзими расму оин, фаъолияти комиссияҳои марбутаи шаҳрию ноҳиявиро ғайриқаноатбахш арзёбӣ карда, ба сохторҳои ҳифзи ҳуқуқ ва раисони шӯрои шаҳраку маҳаллаҳо дастур дод, ки ҷиҳати камхарҷ гузаронидани маъракаҳо назоратро пурзӯр намоянд.           Инчунин, барои сазовор истиқбол гирифтани Соли нави мелодии 2009 ва таъмини иҷрои нақшаҳои дахлдори роҳбарияти пойтахт, раиси шаҳр ба мақомоти ҳифзи ҳуқуқи пойтахт супориш дод, ки дар ҷойҳои баргузории чорабиниҳои идона баҳри таъмини тартиботи ҷамъиятӣ ва амнияти иштирокдорон тамоми чораҳои заруриро андешанд.