МАҲДУДИЯТИ РАФТУОМАДИ ШАҲРВАНДОНИ ҶТ БЕКОР КАРДА ШУД

               Душанбе, 6 октябр. ( АМИТ «Ховар», Наргис Бойахмедова).- Ҷумҳурии Ӯзбекистон маҳдудияти рафту омади шаҳрвандони Тоҷикистонро ба воситаи сарҳади худ бекор кард. Дар ин бора аз сафоратхонаи ин мамлакат дар Душанбе ба АМИТ «Ховар» хабар доданд. Роҳбари дафтари матбуоти Вазорати корҳои хориҷии Тоҷикистон Давлат Назриев зикр намуд, ки маҳдудияти рафту омади шаҳрвандон дар қисми зиёди гузаргоҳҳои сарҳадии Ӯзбекистон бекор карда шуд.              Вазири корҳои хориҷии Тоҷикистон Ҳамрохон Зарифӣ 1 декабр зимни сӯҳбат бо сафири кабири Ҷумҳурии Ӯзбекистон дар Тоҷикистон Шоҳқосим Шоисмоилов масъалаҳои марбут ба муносибатҳои дуҷониба, аз ҷумла рафту омади шаҳрвандони тоҷикро ба воситаи марзҳои Ӯзбекистон баррасӣ намуд.              Ёдовар мешавем, ки дар давоми маҳдудияти рафту омади шаҳрвандон танҳо кормандони сохторҳои дипломатӣ, шаҳрвандони Русия ва шаҳрвандони Тоҷикистон, ки ба Ватан баргаштанианд, аз сарҳадҳои Ӯзбекистон гузашта метавонистанд.