МОДДАҲОИ ТАРФГАРӢ ПИНҲОНӢ БА ҶУМҲУРӢ ВОРИД МЕШАВАНД

            Душанбе, 29 декабр. (АМИТ «Ховар», Анварбек Сиддиқов).- Дар роҳи мошингарди Қизтақуз-Хуҷанд истиқоматкунандаи ноҳияи Бобоҷон Ғафуров – ронандаи мошини сабукрави тамғаи «Опел- Астра» (рақами давлатияш ВР 46 94 02 РТ) Абдуҷалил Самадов ҳангоми гузаронидани амалиёти гумрукӣ аз ҷониби кормандони гумруки вилояти Суғд боздошт гардид. Тавре ба АМИТ «Ховар» аз маркази матбуоти Хадамоти гумруки назди Ҳукумати Ҷумҳурии Тоҷикистон иттилоъ доданд, ҳангоми азназаргузаронӣ аз дохили нақлиёти мазкур 3 қуттии маводи тарфгарии «Золотой песок» ба миқдори 366 адад, фейерверк «Пули пулемет» ба миқдори 33 адад, мушаки «Ракета» як адад ва 3 қуттӣ оташфаввора ба миқдори 86 406 адад дарёфт гардид. Онҳоро Зокирҷон Раҳмонов бо роҳи пинҳонӣ, ғайриқонунӣ бо воситаи нақлиёти Абдуҷалил Самадов аз деҳаи Аркаи Ҷумҳурии Қирғизистон ба вилояти Суғд ворид намуда, мехост ба муомилоти озод барорад. Муфовиқи хулосаи ташхисии маводи аз Зокирҷон Раҳмонов дарёфткардашуда, он ба моводи тарфгарӣ (пиротехникӣ) дохил мешавад.