МУҲОКИМАИ НАҚШАИ ТАДБИРҲОИ ҲАМКОРИИ ГУМАНИТАРӢ

           Душанбе, 4  декабр. (АМИТ «Ховар»,  Наргис  Бояхмедова). —  Имрӯз  дар  шаҳри  Минск  маҷлиси  навбатии   гурӯҳи  коршиносони  мамлакатҳои  ИДМ  баргузор  мегардад. Дар он масъалаи   такмили  нақшаи  тадбирҳои  афзалиятноки   ҳамкории  гуманитарӣ  барои  ду  соли  оянда  муҳокима  карда  мешавад.  Барнома  ҳамкориро  дар  соҳаҳои  фарҳангу  маориф,  илм,  иттилоот, алоқа,  варзиш,  туризм  ва  кор  бо  ҷавонон  дар  бар  мегирад. Лоиҳаи  ҳуҷҷат  такмилу  таҷдиди  ҳуҷҷатҳои  нави  меъёрӣ, гузаронидани мулоқоту  семинарҳо,  симпозиумҳо,  конфронсҳо  ва озмуну   намоишгоҳҳои  муштарак,  таъсиси ҷоизаҳо, пахши барномаҳои  муштараки  телевизиону  радио  ва ғайраро  пешбинӣ  мекунад. Коршиносон  нақшаи  тадбирҳои  ҳамкориро   бо назардошти  пешниҳоду мулоҳизаҳои ба миёнгузоштаи намояндагони  Озарбойҷон,  Арманистон,  Белорусия,   Қазоқистон, Қирғизистон, Россия,  Бунёди  байнидавлатии ҳамкории  гуманитарӣ ва  Шӯрои  ҳамкорӣ  дар  соҳаи  маорифи  мамлакатҳои  ИДМ  такмилу  таҷдид  хоҳанд  кард.