МУСОФИРИ «ГАЗЕЛ-3221» БА ГУНОҲАШ ИҚРОР ШУД

Душанбе, 25 декабр. (АМИТ «Ховар», Мавҷуда Давлатзода).- Кормандони шӯъбаи мубориза бар зидди гардиши ғайриқонунии маводи нашъаовари Раёсати корҳои дохилии вилояти Хатлон дар дидбонгоҳи Сурхоб мошини мусофирбари тамғаи «Газел-3221» (рақами давлатияш ВР 3794 РТ 01) Нурулло Алимови 59-соларо боздошт намуданд. Аз маркази матбуоти Вазорати корҳои дохилии Ҷумҳурии Тоҷикистон ба мухбири АМИТ «Ховар» хабар доданд, ки ҳангоми азназаргузаронӣ аз борхалтаи мусофири мошин — Файзинисо Ғозиеваи 30-сола 2 килограмму 460 грамм бангдона ёфт ва мусодира гардид. Дар рафти тафтиш Ф. Ғозиева иқрор шуд, ки маводи нашъадорро аз шаҳрванд Ҳотам Шамсиддинов гирифтааст. Оид ба ин ҳодиса парвандаи ҷиноӣ боз гардида, тафтиш идома дорад.