ОЗМУНИ ОВОЗХОНОНИ ҶАВОН

                  Душанбе, 22 декабр. (АМИТ «Ховар», Темур Бандишоев). — Аз 19 декабр сар карда, дар шаҳри Душанбе даври интихобии озмуни овозхонони ҷавони мамлакат таҳти унвони «Ориён, Сомониён, Тоҷикистон — 2008» баргузор мегардад. Аз Кумитаи кор бо ҷавонон, варзиш ва сайёҳии назди Ҳукумати ҷумҳурӣ ба АМИТ «Ховар» хабар доданд, ки даври интихобии озмуни мазкур дар минтақаҳои дигари мамлакат низ гузаронида мешавад. Овозхонони беҳтарин дар қувваозмоии хотимавӣ ширкат меварзанд, ки рӯзҳои 25 — 27 декабр гузаронида мешавад.                 Дар озмун ҳамаи овозхонону мутрибони боистеъдод ва ҳунарманди то 30 — сола иштирок карда метавонанд. Озмун 27 декабр бо консерти калони идона бахшида ба Соли нав ҷамъбаст карда мешавад. Мухбири АМИТ «Ховар ёдовар мешавад, ки ба туфайли озмуни мазкур бисёр овозхонони ҷавон ба майдони ҳунар роҳхат гирифтанд.