САФАРИ РАИСИ КУМИТАИ ДАВЛАТИИ АМНИЯТИ МИЛЛИИ ҶТ БА АФҒОНИСТОН

            Душанбе,  5   декабр.  (АМИТ «Ховар», Темур   Бандишоев). —  Раиси Кумитаи  давлатии  амнияти  миллии   Ҷумҳурии  Тоҷикистон Хайриддин  Абдураҳимов ба  Давлати  Исломии  Афғонистон  сафар  кард. Вай зимни сафар бо роҳбарони мақомоти қудратӣ ва   муҳофизи қонуну тартиботи  Афғонистон  силсилаи мулоқотҳо  анҷом  дод. Дар  ҷараёни  ин  мулоқотҳо   масъалаҳои   рушди  ҳамкорӣ  дар  ҳалли  проблемаҳои  марбут  ба  мубориза  ба  муқобили  терроризми  байналхалқӣ,  ифротгароӣ,  қочоқ  ва  хариду  фурӯши  ғайриқонунии  маводи  нашъадор,  инчунин  муҳоҷирати  ғайриқонунӣ  мавриди  баррасӣ  қарор  гирифтанд. Дар  фарҷоми   мулоқотҳо   дар  бораи  таъмини   суботи  вазъияти  сарҳад  ва  ба  роҳ  мондани  мубодилаи  маълумот  дар  байни  мақомоти  дахлдори  ҳар   ду давлати  ҳамсоя  паймон  карда  шуд.