«ВУРОМУН» 8 ҲАЗОР ТОННА АНГИШТ ИСТЕҲСОЛ КАРД

             Душанбе, 15 декабр. (АМИТ «Ховар», Лаззат Диловарзод).- Бино ба маълумоти Вазорати энергетика ва саноат, дар Ҷумҳурии Тоҷикистон захираи зиёди ангишт вуҷуд дорад ва ҳоло аз се як қисми он мавриди истифода аст. Дар минтақаи Рашт дар қатори кони ангишти Назарайлоқ кони ангишти Миёнаду мавриди истифода қарор дорад. Захираи кони ангишти Миёнаду аз ҷиҳати ҷойгиршавии ҷуғрофиаш метавонад тамоми ноҳияҳои Вилояти Мухтори Кӯҳистони Бадахшон ва ноҳияи Тавилдараро ба пуррагӣ бо ангишт таъмин намояд. Соли ҷорӣ аз ангишти Миёнаду мактабҳо ва муассисаҳои тиббӣ ба пуррагӣ таъмин шуданд. Корхонаи «Вуромун» 8 сол боз ба истихроҷи ангишти кони мазкур машғул аст. Ба гуфтаи масъулини корхона, истеҳсоли ангишт дар асоси дархост ба роҳ монда мешавад. Соли ҷорӣ корхонаи «Вуромун» 8 ҳазор тонна ангишт истеҳсол намуд.