ҒАМХОРИҲОИ ДАВЛАТ НИСБАТ БА СОҲИБКОРОН

          Душанбе, 17 январ. (АМИТ «Ховар», Бекназари Абӯбакр). — Соли гузашта аз ҷониби бонкҳои мамлакат ба бахши соҳибкории хурду миёна ба андозаи 1 миллиарду 612 миллион сомонӣ қарзҳои хурд пешниҳод карда шуданд, ки ин нисбат ба соли 2007-ум 57 фоиз зиёд мебошад. Шумораи мизоҷоне, ки дар ин давра қарз гирифтаанд, беш аз 9 ҳазор нафар афзуда, ба 166 ҳазор расидаанд. Сарвари давлат Эмомалӣ Раҳмон дар ҷаласаи ҷамъбастии Ҳукумати ҷумҳурӣ тазаккур дод, ки бо мақсади таъмини рушди соҳибкории хурду миёна ва ташкили ҷойҳои нави корӣ ба Бонки миллӣ ва бонкҳои тиҷоратӣ зарур аст, ки соли ҷорӣ низ ҳаҷм ва теъдоди қарзҳои пешниҳодшавандаро, бахусус барои ноҳияҳои дурдасти кӯҳистон зиёд намоянд. Дар ин самт ба соҳибкории истеҳсолӣ таваҷҷӯҳи бештар зоҳир намуда, фоизи қарзҳои пешниҳодшаванда таҷдиди назар карда шавад. «Дар навбати худ соҳибкорон низ вазифадоранд, ки ӯҳдадориҳои худро дар назди давлат, бахусус доир ба пардохти андозҳо  пурра ва сари вақт иҷро намоянд», — таъкид намуд Президенти кишвар.