ҚАРЗҲОИ «АГРОИНВЕСТБОНК» БА ХОҶАГИҲОИ ПАХТАКОР

            Душанбе, 15 январ. (АМИТ «Ховар», Покиза Маҳмадбекова).- Муовини раиси Ҷамъияти саҳомии «Агроинвестбонк» И.Саидмуродов имрӯз бо мушовири байналхалқӣ дар масъалаи ҳалли проблемаи қарзи  хоҷагиҳои пахтакори Ҷумҳурии Тоҷикистон Тапио Саавалайнен мулоқот кард.            И.Саидмуродов ба меҳмон дар бораи қарзҳои  ба хоҷагиҳои пахтакори мамлакат додаи бонк маълумоти муфассал дод. Аз ҷумла, қайд карда шуд, ки бонк соли 2008 ба хоҷагиҳои пахтакори мамлакат 95 миллион сомонӣ қарз додааст. Мусоҳибон масъалаҳои сари вақт баргардонидани қарзи хоҷагиҳои деҳқонӣ ва роҳу усулҳои ба роҳ мондани ҳамкории ҳамаҷонибаи мақомоти ҳокимияти маҳаллӣ ва бонкҳои тиҷоратиро мавриди баррасӣ қарор доданд. Т.Саавалайнен пешниҳодҳои роҳбарияти бонкро шунида, изҳор кард, ки  онҳоро ҳамаҷониба меомӯзад  ва зимни сафари ояндаи худ ба Тоҷикистон дар моҳи март дар ин бора  ба Ҳукумати мамлакат таклифҳо пешниҳод хоҳад кард.