ҶОПОН ҶИҲАТИ ҲИФЗИ ЁДГОРИҲОИ ТОҶИКИСТОН КУМАК МЕКУНАД

                Душанбе, 21 январ. (АМИТ «Ховар», Бекназари Абӯбакр). — Ҳукумати Ҷопон тасмим гирифтааст, ки ба Пажуҳишгоҳи таърих, бостоншиносӣ ва мардумшиносии Академияи илмҳои Тоҷикистон барои ҳифзи ёдгориҳои таърихӣ ба маблағи тақрибан 88 ҳазор доллари ИМА кӯмаки ройгон кунад.                Чуноне, ки дар Пажӯҳишгоҳи мазкур ба мухбири АМИТ «Ховар» иттилоъ доданд, дар назар аст, ки дар ин бора директори Пажуҳишгоҳи таърих, бостоншиносӣ ва мардумшиносии Академияи илмҳои Тоҷикистон Раҳим Масов ва кордори Сафорати Ҷопон дар Тоҷикистон Ёшихиро Накаяма қарордод ба имзо расонанд.                Ёдовар шудан ба маврид аст, ки чанд сол пеш Ҳукумати Ҷопон барои ҳифзи ёдгориҳои таърихии Осорхонаи бостоншиносии Тоҷикистон 460 ҳазор доллари амрикоӣ ҷудо намуда буд.