«АМОНАТБОНК» УЗВИ СИСТЕМАИ БАЙНАЛХАЛҚИИ ПАРДОХТҲО ГАРДИД

                                                              Душанбе, 15 январ. (АМИТ «Ховар»,  Покиза Маҳмадбекова).- Раиси Бонки давлатии амонатгузории Ҷумҳурии Тоҷикистон «Амонатбонк» Маҳмадамин Маҳмадаминов дар ҷараёни нишасти матбуотӣ зикр намуд, ки  маблағи ҳамлу нақли пул ба воситаи бонки мазкур дар соли 2008 — ум  367,2 миллион доллари ИМА- ро ташкил дод. Ин нисбат ба соли 2007  -ум  89,3 фоиз зиёд мебошад. Қайд карда шуд, ки бонк айни ҳол  бо 11 бонки хориҷӣ ҳамкорӣ мекунад.         Дар бонк  соли гузашта навъи нави хизматрасонӣ ба мизоҷон, яъне ба воситаи кортҳои пластикӣ гирифтани маблағ ҷорӣ карда шуд. Соли гузашта инчунин  «Амонатбонк» ба узвияти системаи байналхалқии пардохтҳои «Виза» қабул гардид. Бонк соли 2008 дар Иттифоқи байнибонкии  Созмони ҳамкории Шанхай намояндаи Ҷумҳурии Тоҷикистон таъин карда шуд. Қайд карда шуд, ки «Амонатбонк» бо  Бонки давлатии рушди Чин созишномаи ҳамкорӣ имзо кардааст.