БӮҲРОНИ МОЛИЯВӢ БА ИҚТИСОДИЁТИ ҚИРҒИЗИСТОН

              Бишкек, 22 январ, (АМИТ «Ховар» — Кабар). — Вазири молияи Қирғизистон Марат Султонов 21 январ дар маҷлиси гурӯҳи Ҳизби коммунист дар Жогорку Кенеши (парламент) зикр намуд, ки бӯҳрони ҷаҳонии молиявӣ ба иқтисодиёти мамлакат таъсири калони манфӣ расонд. Вай лоиҳаи қонунро дар бораи ворид сохтани тағйирот ба қонуни буҷети ҷумҳурӣ дар соли 2009 пешниҳод карда, изҳор намуд, ки натиҷаҳои асосии макроиқтисодии буҷет нисбати маблағи Маҷмӯи маҳсулоти умумии дохилӣ хеле кам гардидааст. Маблағи Маҷмӯи маҳсулоти умумии дохилии кишвар соли 2008 — ум 185 миллиарду 13 миллиону 600 ҳазор сомро ташкил дод. Тибқи нақша, ин маблағ мебоист хеле зиёд карда мешуд, вале воқеан хеле кам гардид, гуфт вазири молия. Вай таъкид кард, ки Қирғизистон бояд мисли мамлакатҳои дигари ҷаҳон барои бартараф сохтани оқибати бӯҳрони ҷаҳонии молиявӣ тадбирҳои қатъӣ ва судбахш андешад.