БА ҚОНУН «ДАР БОРАИ ФАЪОЛИЯТИ ХУСУСИИ ТИББИ» ТАҒЙИРУ ИЛОВАҲО ВОРИД МЕШАВАД

             Душанбе, 20 январ.(АМИТ «Ховар», Марзия Саидова).-Лоиҳаи Қонунҳои Ҷумҳурии Тоҷикистон «Дар бораи таҳсилоти олии касбӣ ва таҳсилоти касбии баъд аз муассисаи олии таълимӣ», «Дар бораи ҳимояи давлатӣ», «Дар бораи суғуртаи мутақобила», «Дар бораи мораторий ба санҷишҳои фаъолияти субъектҳои соҳибкории хурду миёна дар Ҷумҳурии Тоҷикистон», лоиҳаи Қонунҳои Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи таъмини нафақаи хизматчиёни ҳарбӣ», «Дар бораи фаъолияти хусусии тиббӣ» аз масъалаҳое буданд, ки дар ҷаласаи навбатии Шӯрои Маҷлиси намояндагони Маҷлиси Олии мамлакат баррасӣ гардиданд.             Ҳамчунин, аъзои Шӯро Созишномаи байни Ҳукумати Ҷумҳурии Тоҷикистон ва Ҳукумати Ҷумҳурии Исломии Покистон оид ба ташвиқ ва ҳимояи мутақобилаи сармоягузориҳоро муҳокима карда, муҳимияти масъалаҳои зикргардидаро шарҳ доданд.             Зикр шуд, ки масъалаҳои мазкур ба рушди соҳаҳои иқтисодию иҷтимоӣ ва илмию фарҳангии ҷумҳурӣ мусоидат менамоянд.              Баъд аз муҳокимарониҳои аъзои Шӯро масъалаҳои баррасишударо ҷиҳати хулосабарорӣ ба Кумитаҳои палатаи поёнии парлумони мамлакат ва иҷлосияи навбатии Маҷлиси намояндагони Маҷлиси Олии ҷумҳурӣ пешниҳод намуданд.