БУРДУ БОХТИ ДОНИШКАДАИ ИСЛОМӢ

Душанбе, 19 январ. (АМИТ «Ховар», Илҳом Нарзиев).- Муовини ректори Донишкадаи исломии Тоҷикистон Тоҷиддин Мардонӣ зимни сӯҳбат бо хабарнигорон изҳор намуд, ки  донишкада фаъолияти худро  дар  асоси таълимоти имом Абӯҳанифа ба роҳ монда, соли равон дар ҳамаи  тадбирҳои бахшида ба  бузургдошти хотираи имом Абӯҳанифа фаъолона ширкат хоҳад варзид. Қайд карда шуд, ки омӯзгорону донишҷӯёни донишкада ба ин муносибат аллакай силсилаи асару мақолаҳо таҳия ва чоп карданд. Мухбири АМИТ «Ховар» ёдовар мешавад, ки  Донишкадаи исломӣ бо қарори Ҳукумати ҷумҳурӣ моҳи феврали соли 2007 таъсис ёфта буд. Донишкада алҳол як факулта дорад. Дар он аз рӯи  панҷ ихтисос — ихтисосҳои қуръоншиносӣ, илмҳои исломӣ, филологияи араб, фалсафа ва дин, таърихи ислом ва диншиносӣ мутахассисон тайёр карда мешаванд. Дар донишкада 7 кафедра фаъолият дорад. Дар ин ҷо бештар аз 80 омӯзгор ба   900 донишҷӯ дарс медиҳад. 62 нафари донишҷӯён дар шӯъбаи ғоибона таҳсил мекунанд. 114 нафари  донишҷӯёни донишкада духтаронанд.Тоҷиддин Мардонӣ афзуд, ки ташаккули фаъолияти донишкада давом дорад ва  ояндаи наздик боз ҳам вусъат дода хоҳад шуд.