ЧАНД САВОЛИ НОРАВШАНИ «КОНСЕПСИЯИ АГРАРӢ»

         Душанбе, 9 январ. (АМИТ «Ховар», Лаззат Диловарзод).- Дар Вазорати кишоварзӣ оид ба қабули «Консепсияи аграрии Ҷумҳурии Тоҷикистон» нишасти матбуотӣ доир гашт. Директори Пажӯхишгоҳи иқтисодии Вазорати кишоварзӣ Ҷалил Пириев иброз дошт, ки мақсад аз қабули «Консепсияи аграрӣ» амалӣ гардидани сиёсати аграрии Ҷумҳурии Тоҷикистон, баланд бардоштани самаранокии истифодабарии захираҳо, оқилона ҷойгир сохтани истеҳсолоти кишоварзӣ, беҳтар намудани таъминоти аҳолӣ бо озуқа ва бо ашёи хом таъмин намудани саноати коркарди маҳсулоти соҳаи кишоварзӣ мебошад. Дар нишасти матбуотӣ он чиз норавшан монд, ки дар раванди истеҳсолоти аграрӣ ба ивази собиқ хоҷагиҳои коллективӣ, ки беш аз 29 ҳазор хоҷагиҳои деҳқонӣ (фермерӣ) таъсис ёфта 80 фоизи замин барои истифодаи якумра ба онҳо дода шудааст, дигарон чӣ манфиат мебинанд?. Илова бар ин,  дар ин нишаст ба саволҳои хабарнигорон, ки «Консепсияи кишоварзӣ» тавассути  чӣ қадар маблағ ва аз кадом сарчашмаҳои даромад амалӣ мешавад, беҷавоб монданд.