ДАР ПАРИЖ САФОРАТХОНАИ ТОҶИКИСТОН КУШОДА МЕШАВАД

        Душанбе, 8  январ. (АМИТ «Ховар»,  Наргис  Бояхмедова). –  Президенти  Ҷумҳурии  Тоҷикистон  Эмомалӣ  Раҳмон баъди  чошти  дирӯз  бо сафири кабири  Фаронса   дар  Ҷумҳурии  Тоҷикистон Оливе Метланд – Пелен бо  сабаби   ба  охир  расидани  мӯҳлати  сафораташ   дар  мамлакати мо  мулоқот  кард. Сафир   баъди  анҷоми  мулоқоташ  бо  Президент   зимни  сӯҳбати  мухтасар  бо  хабарнигорон   зикр  намуд, ки  бо Президенти  Тоҷикистон  масъалаҳои   ҳамкориро   дар   соҳаҳои  рушди  иқтисодиёт,  сиёсат  ва таъмини  амнияти  минтақа баррасӣ  намудааст.  Дар  ҷараёни  сӯҳбат  сухан  дар  бораи   равнақу  ривоҷи  минбаъдаи  муносибатҳои  Тоҷикистону  Фаронса  рафт. Сардори  давлати  Тоҷикистон  изҳор  намуд, ки   ояндаи  наздик   дар   Фаронса  сафоратхонаи Тоҷикистон  кушода  мешавад,  гуфт  дипломати  фаронсавӣ. Мухбири  АМИТ «Ховар»  хабар  медиҳад, ки  Оливе Метланд – Пелен   дар  Тоҷикистон  бештар  аз  ду  сол   кор  кард. Дар  давраи  сафорати  ӯ бо  кӯмаки  Ҳукумати  Фаронса  хати  парвози  фурудгоҳи   Душанбе  пурра  тармим  карда  шуд.